Sætkartöflusúpa

Á köldum vetrardegi finnst mér æðislegt að fá mér heita súpu og gott brauð með. Þessi súpa er ekki bara einföld í gerð heldur dásamlega góð. Ég geri hana reglulega og tek alltaf með mér í nesti daginn eftir og hún er sko ekki verri þá. Mér finnst hún best maukuð en ég mauka hana í blandaranum mínum þegar hún er tilbúin, einnig er hægt að nota töfrasprota. 

Fyrir: 4

Undirbúningur: 25 mínútur

Innihald:

1 sæt kartafla

Lítill poki gulrætur

1 líter vatn

3 msk grænmetiskraftur (ég notaði frá Himneskri hollustu)

3 msk tómatpúrra (ég notaði frá Himneskri hollustu)

Salt & pipar eftir smekk

(1 1/2 msk Moroccan rub frá NOMU, fæst t.d í Fylgifiskum)

 

Aðferð:

Setjið 1 líter af vatni í pott og sjóðið. Skrælið sætu kartöfluna og gulræturnar, skerið í litla bita (mér finnst best að nota matvinnsluvél til þess að saxa þetta niður í litla bita) og setjið út í vatnið og sjóðið í 15-20 mínútur ásamt grænmetiskraftinum og tómatpúrrunni. Kryddið með salti og pipar og ef þið eigið Moroccan Rub kryddið þá gefur það súpunni æðislegt bragð, einnig er hægt að nota í staðin t.d. piri piri eða annað krydd til að gera súpuna bragðmeiri ef þið eigið ekki Moroccan Rub. Maukið í blandara eða með töfrasprota og njótið vel!

LoadingFavorite